Kea 'a nʋʋdɩ nmɔ "jrii
111
Ao 'bɛɛ‑ Kea 'nynɩ "i.'Ma muɛ Tʋ "bo 'nynɩ ‑saa',
'de 'ma pɛe ‑wee'‑ "klein" 'ʋn,
'bo "isrɛʋn 'a ‑kwea'‑.
2 Tʋ "bo 'a nʋʋdɩ "bɛi.
Ɩmɩ nyʋ "klein" ‑kma ɛɛ' ‑tɩ' a ‑pɔn,
ʋʋ 'je ‑sɔn i 'wɔn.
3 Dɛ 'oo dɛ ɛ nʋa, ɩ ‑wee'‑ a fan',
ɛɛ nʋɛ blɛblɛ‑,
‑wɛe ɛɛ' "isrɛa' 'je nɩ jeejee.
4 Ɛ nɩɛ "i dɩ 'dɔe ɛ nʋa,
ɩ 'je nyʋ "jru 'di sie‑.
Tʋ "bo a 'jeɛ nyʋ 'a wɛe‑,
ɛɛ 'wɔn nyɔ 'ɔ 'kmʋ 'mii.
5 Ɛmɛ ‑ɛɛ ‑nyɩ" nyʋ ‑ʋʋa pleeɛ diiɛ‑.
Ɛɛ poɛ dbɛɛdɛ ɛ poa 'e ɛ ke,
nyiɔ 'nynɩ 'a ‑tɩ' ‑kwlʋ o jeejee.
6 Ka ɛɛ' nʋʋdɩ 'bɛai" ɛ,
ɛ to ɛɛ' sʋn 'mɛ 'de ɛɛ' 'cɛ o,
ɛ "nyɩ ʋʋpʋ‑ nyʋ jrʋ' 'a 'kɛn 'mɛ ʋʋ jeɛ kpa.
7 Dɩ "klein" ɛɛ' sʋn nʋa,
ɩmɩ ‑toɛ kɛ "srɛai ɛ,
ɛɛ' kɛ' ‑wee'‑ a "siiɛ nyʋ 'a 'mɩ i.
8 Ɩa' sɔn i jeejee, dɛ ‑nʋɛ ɩ "srɛi,
ɩ nɩɛ tɔ', ɩa' poo fai".
9 Tʋ "bo ‑a seie ɛɛ' 'cɛ,
‑wɛe ɛ po ʋʋpʋ‑ dbɛɛ sʋn 'kwa.
Ɛɛ 'nynɩ ‑kwɛi, nyɔ 'ɔ "crɛɛ "kpei.
10 Tɔ'di nɩa' 'a ‑gbɔo ‑saa',
mɛ ‑nɩ Tʋ "bo wɔn 'jea'.
Nyɔ 'oo nyɔ ‑ɔɔ ‑tea' ɛɛ' ni juuɛ dɛi",
tai' seɔ "maa i.
Tʋ "bo 'nynɩ ‑saa' a muɛ nɩa' mamaʋ 'sʋ.